លបស្តាប់សំឡេងគេរួមរ័កស្រែកថាចោរ ប៉ូលិសបាញ់របួសធ្លាយភ្លៅយុវជនម្នាក់
បញ្ចូលអត្ថបទ ៖ បុប្ផា កោះ
ថ្ងៃពុធ ទី៧ ខែវិច្ឆិកា ឆ្នាំ២០១២ ម៉ោង ១២:៣០
ខេត្តសៀមរាប ៖ យុវជនម្នាក់ក្នុងចំណោម ៣នាក់ត្រូវនាយរងប៉ុស្ដិ៍រដ្ឋបាលឃុំខ្វាវ បាញ់ឱ្យរបួសធ្លាយភ្លៅម្ខាងទៅម្ខាង ។ ហេតុការណ៍នេះកើតឡើងកាលពីវេលាម៉ោ១១និង៥៦នាទីយប់ថ្ងៃទី២ វិច្ឆិកា នៅក្នុងភូមិក្រាំង ឃុំខ្វាវ ស្រុកជីក្រែង ខណៈយុវជនម្នាក់នោះនិងមិត្តភក្តិលួចចូលទៅក្រោមផ្ទះជួលរបស់គ្រូពេទ្យវ័យ៥០ឆ្នាំម្នាក់ ដើម្បីស្ដាប់សំឡេងនៃការរួមរ័ករបស់គាត់ជាមួយប្រពន្ធចុង ។ ថ្វីបើជារាត្រីដ៏ត្រកាលក្តី តែពេលដឹងថាមានមនុស្សនៅពីក្រោមផ្ទះក៏បានស្រែកបង្អើលថាចោរៗ។
ទាក់ទិនទៅនឹងហេតុការណ៍នោះលោកអនុសេនីយ៍ទោហុក វ៉ាន នាយប៉ុស្ដិ៍រដ្ឋបាលឃុំខ្វាវ បានប្រាប់កាលពីវេលាថ្ងៃត្រង់ទី៦ វិច្ឆិកា ថា ប៉ូលិសដែលផ្ទុះអាវុធនៅយប់កើតហេតុនោះគឺលោកអនុសេនីយ៍ត្រីគួន វិសេស ជាអនុប្រធានប៉ុស្ដិ៍ ។ ចំណែកយុវជនដែលរងរបួសឈ្មោះយៀម នៀន អាយុ២១ឆ្នាំ បានរងរបួសធ្លាយភ្លៅខាងឆ្វេងពីម្ខាងទៅម្ខាង ប៉ុន្ដែមិនបាក់ឆ្អឹងទេ ។
លោកប្រាប់ពីមូលហេតុនៃការផ្ទុះអាវុធនាយប់នោះថា នៅយប់កើតហេតុរូបលោកបានទទួលទូរសព្ទ័ពីលោកគឹម សេងឡុង គ្រូពេទ្យឯកជននៅក្នុងភូមិកើតហេតុថាមានមនុស្សលួច ចូលក្រោមផ្ទះគាត់មានបំណងសម្លាប់គាត់ និងលួចម៉ូតូនៅក្រោមផ្ទះ ។ ក្រោយពីទទួលដំណឹងបែបនេះរូបលោកនិងអនុប្រធានប៉ុស្ដិ៍បានទៅអន្ដរាគមន៍ ហើយទូរសព្ទ័ប្រាប់ឱ្យម្ចាស់ផ្ទះស្រែកថាចោរៗ ដើម្បីបង្អើល ហើយស្រាប់តែមានមនុស្សមិនស្គាល់មុខ៣នាក់ រត់ចេញពីក្រោមផ្ទះ។ ពេលនោះលោកអនុសេនីយ៍ត្រីគួន វិសេស ដែលកាន់អាវុធAK ៤៧ស្វាយបត់សម្រេចចិត្ដបាញ់ទៅលើដីអស់ជាច្រើនគ្រាប់ ។
លោកបន្ថែមថា នៅយប់នោះសមត្ថកិច្ចមិនបានចាប់ជនណាម្នាក់ទេ ហើយក៏មិនបានដឹងថាបាញ់ត្រូវចំមនុស្សដែរ លុះព្រឹកឡើងទើបមានព័ត៌មានថាប៉ូលិសបាញ់ធ្លាយភ្លៅយុវជនម្នាក់ ។ ភ្លាមៗនោះសមត្ថកិច្ចបានស្រាវជ្រាវទើបដឹងថា យុវជនឈ្មោះយៀម នៀន ដែលរបួសនិងយុវជនពីរនាក់ទៀតឈ្មោះ ម៉ៅ ស៊ា អាយុ២១ឆ្នាំ និងឈ្មោះវ៉េត កន អាយុ ២០ឆ្នាំ រស់នៅភូមិជាមួយគ្នាបានទៅលបចូលក្រោមផ្ទះលោកគ្រូពេទ្យគឹម សេងឡុង កាលពីយប់ ។
ប៉ូលិសនិយាយថា លោកគឹម សេងឡុង អាយុ៥០ឆ្នាំ ធ្វើជាគ្រូពេទ្យឯកជននៅក្នុងភូមិបានជួលផ្ទះកើតហេតុស្នាក់នៅ ។ នៅយប់នោះគាត់បានយកប្រពន្ធចុងរបស់គាត់ដែលមានស្រុកកំណើតនៅខេត្ដតាកែវទៅដេកនៅលើផ្ទះ ហើយត្រូវយុវជនទាំងបីនាក់លបលួចសម្ងំនៅពីក្រោមផ្ទះ ។
នៅព្រឹកថ្ងៃ៣ វិច្ឆិកា ក្រោយកើតហេតុ លោកគ្រូពេទ្យគឹម សេងឡុង បានដាក់ពាក្យ បណ្ដឹងចោទប្រកាន់ក្រុមយុវជនទាំងបីនាក់នោះពីបទប៉ុនប៉ងមនុស្សឃាតនិងលួច ។
នៅចំពោះមុខសមត្ថកិច្ចយុវជនទាំងបីនាក់នោះសារភាពថា ពួកគេលបលួចចូលទៅក្រោមផ្ទះជួលរបស់លោកគ្រូពេទ្យនោះ ប៉ុន្ដែមិនមានបំណងប្លន់ ឬរៀបគម្រោងការធ្វើឃាតទេគ្រាន់តែចាំស្ដាប់សំឡេងរួមមេត្រីរបស់លោកគ្រូពេទ្យជាមួយប្រពន្ធចុងប៉ុណ្ណោះ។
ថ្វីបើមានការបាញ់ឱ្យរបួសមនុស្សយ៉ាងនេះក្ដីលោកអនុសេនីយ៍ទោហុក វ៉ាន អះអាងថា ករណីនោះបានសម្រួលគ្នាចប់សព្វគ្រប់ហើយ មិនមានអ្នកណាប្ដឹងអ្នកណាទេ ព្រោះខាងអាណាព្យាបាលយុវជនទាំងនោះបានទទួលស្គាល់ពីកំហុសរបស់កូនៗរបស់ពួកគាត់ ។
ទាក់ទិននឹងករណីប៉ូលិសបាញ់ប្រជាពលរដ្ឋឱ្យរបួសនោះក្រុមមន្ដ្រីការពារសិទ្ធិមនុស្សបាន ចាត់ទុកថាជាករណីរំលោភសិទ្ធិ និងជាបទល្មើសព្រហ្មទណ្ឌ។ ការសម្របសម្រួសគ្នាដោះស្រាយក្រៅប្រពន្ធ័អាចធ្វើទៅបានដោយសារតែជនរងគ្រោះភ័យខ្លាច ប៉ុន្ដែបណ្ដឹងអាជ្ញាមិនអាចរលត់ទេ ។ មន្ដ្រីដដែលនោះបានបន្ថែមថា សមត្ថកិច្ចមានសិទ្ធិចាប់ជនសង្ស័យយកទៅសួរចម្លើយ ប៉ុន្ដែមិនអាចកេះកៃកាំភ្លើងបាញ់ជនសង្ស័យដែលគ្មានអាវុធជាប់នឹងដៃបានទេ ព្រោះប្រទេសយើងគ្មានច្បាប់ប្រហារជីវិត។ នេះសំណាងហើយបាញ់ត្រូវធ្លាយភ្លៅ មិនចំកន្លែងសំខាន់បើសិនជាស្លាប់កាន់តែធ្ងន់មិនខាន ៕
ទាក់ទិននឹងករណីប៉ូលិសបាញ់ប្រជាពលរដ្ឋឱ្យរបួសនោះក្រុមមន្ដ្រីការពារសិទ្ធិមនុស្សបាន ចាត់ទុកថាជាករណីរំលោភសិទ្ធិ និងជាបទល្មើសព្រហ្មទណ្ឌ។ ការសម្របសម្រួសគ្នាដោះស្រាយក្រៅប្រពន្ធ័អាចធ្វើទៅបានដោយសារតែជនរងគ្រោះភ័យខ្លាច ប៉ុន្ដែបណ្ដឹងអាជ្ញាមិនអាចរលត់ទេ ។ មន្ដ្រីដដែលនោះបានបន្ថែមថា សមត្ថកិច្ចមានសិទ្ធិចាប់ជនសង្ស័យយកទៅសួរចម្លើយ ប៉ុន្ដែមិនអាចកេះកៃកាំភ្លើងបាញ់ជនសង្ស័យដែលគ្មានអាវុធជាប់នឹងដៃបានទេ ព្រោះប្រទេសយើងគ្មានច្បាប់ប្រហារជីវិត។ នេះសំណាងហើយបាញ់ត្រូវធ្លាយភ្លៅ មិនចំកន្លែងសំខាន់បើសិនជាស្លាប់កាន់តែធ្ងន់មិនខាន ៕
0 comments:
Post a Comment